〈阿母的梳粧檯〉
拋荒足久矣！過時的青春
恬恬徛佇壁堵邊 阿母的梳粧檯
阿爸偷偷仔買予伊 愛情的證明
雕刻佇年輪邊仔的玫瑰 確實媠幾若年
看伊 抹粉點胭脂 看伊 hiù芳水
看伊穿懸踏仔去踅街 看伊捾等路
歡歡喜喜轉去後頭厝
真是予人欣羨 佇伊的舞池
蜜粉、香油、胭脂攏咧排隊跳七彩的舞步
khu-lì-mù、真珠膏、止汗的爽身粉、資生堂
蜂蜜的雪文、蜜絲佛陀的化妝水……
嘛有頭毛箍仔共伊的美麗箍起來
阿母的梳粧檯 屜仔內底囥足濟
阮囡仔時代的甜蜜 鏡內嘛有一个囡子
陪我偷偷仔咧看 看伊牽我的手佇遐寫功課
嘛捌滴著烏墨水……伊教我愛細膩
鉛筆刀仔毋通剾著桌面
閣予我五角銀去買四秀仔
大漢了後 斟酌看——鏡台略略仔閣有光
不而過黏袂牢伊的青春。走出來的皺痕嘛閘袂止
伊的珠淚。彼年濁水溪淹大水 想欲退休的阿爸
載甘蔗去糖廠 想袂到無法度參詳的歲月若火車
一節一節共伊挵過來
啊！一區好田煞來欠水……。我知影
有一暫仔——蟮蟲仔爬過；虼蚻的卵
覕佇腹肚咧生湠；鳥鼠可能幾若代嘛來
用喙齒佇瘦抽的桌跤刻花——阿母的梳粧檯
繁華的水池已經洘旱幾若年。
靈活的眼神予目屎淹死
圓鏡的邊仔藏一寡必巡
浮雕的花蝶仔沓沓仔咧落漆
嘛無閣用胭脂水粉耕作家己的青春
彼工轉去共伊做生日；雞卵糕囥咧鏡台
伊歡喜 那講那笑閣那哭 講阮阿爸較早
定定呵咾伊的目睭真媠 講阿爸愛風騷閣愛啉酒
害伊現今托袂穩的拐仔閣咧做牛犁。我也笑講
略約一甲子深棗紅色的老酸枝 想袂到
對過身幾若冬的阿爸閣帶有醋味
伊文文仔笑……閣講伊的梳粧檯
日後——欲送予查某孫仔做嫁粧
得獎者介紹
作者｜王怡仁
作者簡介｜王怡仁，關心世界、審核文書，「華舞伴金銀工」創藝總監。曾獲聯合報文學獎、葉紅文學獎、打狗鳳邑文學獎等新詩獎項。
得獎感言｜記取母父青春、子女親情，生命源流與承傳。感謝評審鼓勵；感謝桃城。