452
海風𤆬領八音，油麻菜子
一路搖搖幌幌，來到海口的苦瓜藤跤
發穎、落根
開湠愛的枝葉
溫馴洗盪苦水，生湠阮六欉的幼穎
春雨綿綿潤心脾，熱天炎日ua-sá-bih
秋風微微酸帶甜，冬雨酸冷鑽心穎
你講：「鹹酸苦汫攏是滋味，堅持，就會開出好花蕊。」
癌，一粒無生目睭的銃子
無張無持，射迵你猶閣是一蕊花的年紀
毋甘幼穎失去護持
儼硬，是你無聲的抗議
厝前，無奈命運唱聲踏話頭
厝後，無情病疼聳鬚歹剃頭
面對強欲淹過厝瓦的掣流
你用寬容的愛補紩空喙
共㴙㴙滴的血水化做勇氣
一擺閣一擺，牚直荏弱的骨枝勇敢參in推撨
終其尾，硬插拚贏拗蠻
轉踅佇冷面無常隨時會出現的路口
現實共驚惶逼甲啞口
你講：「海口人哪有咧驚風透，湧閣較大，總嘛會洘流。」
日子，袂輸是缺角的磚仔頭
毋管偌硬篤，你拍死無退用心一塊一塊勻勻仔鬥
向望，會當敆出一片曠闊的埕斗
庄裡紅蔥頭大出的時
你用目屎切蔥頭
我用別人咧𨑨迌的時間鉸蔥仔尾
我指頭仔膨疱的疧，疼佇你毋甘的心肝穎
你堅定無認命的精神，像溫柔的月光
炤光我的心窗行向光明
壁邊跤，趕欲落海的日頭
共咱做伙做手工的影寫做一首詩
咱的笑聲，染紅天頂的雲尪
咱的汗水，點光暗暝的天星
一粒一粒金鑠鑠，妝娗咱心肝頭彼个小小的願望
歲月無頭神，一出門就袂記得轉去
穀雨搬徙拋荒的記持
雨過的天橋頂，你的笑容開出七彩的色水
彼，是我心肝頭上媠的花蕊
文｜蔡秋雲
筆名季芸，臺南人，臺北商專國際貿易科畢。獲2022年臺中文學獎臺語詩優選、2023年打狗鳳邑文學獎臺語新詩高雄獎，作品主要刊登台客詩刊、臺江臺語文學、海翁台語文學。