165
〈阿公的飯盒仔〉
木屐寮，一管像蛇的白煙淹過跤目
司機員予風搐長的背影猶少年
珠淚已經抝曲阿公歲頭
想欲放袂記的日子一張一張印做夢
對刺刀尾的血痕旋出來
用蛇的姿勢咬絚軍伕的命底
阿公共記持割一角仔落來，吹風爁日
捏做孤鳥對南洋飛轉來
梢聲的喉吞落窗外一粒一粒銃子染紅的島
落框的手勢破開窗內闊莽莽的狂湧
落尾火車停落來
伊的心也停落來
褪掉過去，伊
剉一管迵天竹搵溼溼的山風
畫一逝彩虹鬥搭畚箕湖的暮色
割斷未來，伊
削薄翼股釘根內山斗底滿滿的天星
用結趼雙手，炊出工仔喙內幸福的滋味
一粒山換一車柴
一車汗換一工的生活
無疑，公路鏨斷一節一節向天的夢
阿公的飯盒仔
貯滿阿里山白茫茫的雲尪
閣囥一粒金滷卵
伊拍開薄縭絲的翼
用曲痀的飛影共希望一橛一橛接轉來
嗚嗚，一逝白色茫煙
一括起落的跤步
火車猶閣開始笑
春雨滴落來孤鳥皺痕的面，風中攏是暴穎的聲音
文｜張元任
Khí盤（Keyboard）敢若水田一支鋤頭，掘出來攏是家己的影。