一月，我們邀請經營社群「學台語 O̍h Tâi-gí」的作家温若喬，在手寫週記中展開一個月的母語書寫。剛出版首部詩集《日花閃爍》，她將那些散落在辭典與日常中、極具畫面感的詞彙一一拾起。正如書名寓意陽光穿透葉縫形成的細碎光影，她以文字捕捉這份屬於島嶼的獨特美感。本月，她將以全台文手寫字，記錄生活縫隙裡的百味，在聲韻與漢字的流轉間，帶領讀者重新領略台語那份細緻與典雅的風景。
第一周
新年的頭一禮拜，嘛是成做社會人的第三個月，猶閣咧掠各項穡頭的平衡（做Freelancer誠實無簡單 T_T）。有時頭殼真正𢯾咧燒，佳哉這禮拜的台北是我愛的寒冷天氣，逐改穿オーバー行咧街仔路散步的時陣，攏涼甲真使人清醒。
這禮拜嘛有一層大代誌，就是我總算出版人生中頭一本詩集！！原底閣有小可仔煩惱台文冊逐家敢會因為僫讀就較無愛入手，結果銷路比預想的好幾若倍，對頭一改出個人創作的我實在是真大的鼓勵。攑筆寫這本詩集進前，有度過一段較辛苦的時間，想欲共這本冊送予當當時的家己，和伊講：辛苦矣！
工課以外，這禮拜嘛有真濟和朋友佮厝內人鬥陣的幸福時間，佮爸媽閣有阿媽做伙去食咖啡，迒年彼工閣和一陣講台語的朋友食火鍋，耍switch到半暝四點（超級雞馬誠趣味⋯⋯）坐四點外的捷運彼時感覺這真正毋是26歲的體力會當消化的行程，毋過實在足心適嘛難得！2026有一个好的開始，予我真期待紲落來的一年：）
喬
第二周
這禮拜接受公視台語台的訪問，想著頂改去美容院已經是欲半冬進前，就佇訪問前幾工仔專工去染電頭鬃，坐規下晡五點外鐘實在足久，創完家己閣看袂慣勢，打扮真正是真困難的代誌XD 毋過訪問是順利結束矣，會當和逐家分享家己出冊的歷程感覺真有意義嘛真榮幸。
這禮拜嘛有去診所做心理師的工課，診所的逐家足古錐，攏咧為著新年寫春聯，我嘛用台文寫兩張貼咧，感覺規个空間攏足有喜氣 haha，真正足佮意這馬服務單位的氛圍，逐家攏足親切，嘛發覺佇健康的環境做穡是偌重要的代誌！
猶閣有，後禮拜欲搬厝矣！這間厝徛十偌冬，自我國中到出社會的記持，伊攏替我收藏，這馬欲離開誠實感覺毋甘，這个陪我大漢的所在，閣看嘛無幾工矣呢！是阮較惜情，嘛真正感謝這段時間伊所有的照顧。希望後一个蹛入來的家庭，嘛會當受伊庇蔭，度過順序平安的日子。
喬
撰文、圖片提供｜温若喬
1999年生。淡水人。畢業於國立臺灣大學社會學系與心理學研究所，興趣是寫作、音樂、看劇、學語言與研究人類。現為自由接案作家與臨床心理師，於Instagram及Threads經營台語社群「ohtaigi」與個人帳號「wenwriting」。曾獲2019第八屆臺中文學獎台語詩組佳作、2022第十一屆臺中文學獎台語詩組首獎、2024第30回前田純孝賞学生短歌コンクール準前田純孝賞。譯有《浪鳥集：泰戈爾漂鳥集台文版》。